Tsapter

Linggo, Pebrero 8, 2015

Nagpatasa ako ng Buhok sa Barber Shop at...

Sa totoo lang, hindi na talaga ako sanay na sa Barbershop nagpapagupit. Pero dahil nasa Olongapo ako, at kakaiba ang titig ng mga Baklang manggugupit dito ay natakot na ako sa pwedeng mangyari (Idagdag mo pa ang pagkatalo ng Pilipinas sa Miss Universe). Kaya nauwi ako sa dati kong gawi, ang magpagupit sa Barbershop. Dito sa dating pinagpapagupitan ko noong Hayskul kapag kinultapan ni Sir Murillo dahil sa mahabang buhok.

So ayun na nga! Pagkapasok ko, maraming nagpapagupit. Nakapila doon sa tatlong Barbers, yun yung mga datihan na talagang nanggugupit doon. Sila yung mga beteranong mabibilis at malaki ang kinikita isang araw! Pero may napansin ako, doon sa dulo, sa may bakanteng Barber’s Chair ay may nakaupong mama. Pangit sya pero maganda yung gupit nya. Nung una ang akala ko tambay lang kasi hawak lang ang Cellphone nya. So nilapitan ko, tinanong ko kung nanggugupit sya. At hindi nga ako napahiya dahil Barbero nga siya! At tulad nga ng iniisip ko ay baguhan sya at medyo kulang ang gamit sa panggugupit.

Maraming pumasok sa isip ko, isa na kung bakit walang nagpapagupit sa kanya gayong marami namang nagaantay? Nag-isip ako ng mga dahilan;

Dahil hindi halatang Barbero?

Dahil mas bata ng higit sa mga kasama nya?

Dahil Pangit?

Dahil mukhang mutation ni Smugglaz at Zaito?

Dahil mukhang Hindi magaling?

O Dahil Bago lang sya sa Barbers Shop?

Dahil nga medyo may hinahabol akong oras, ay sa kanya na ako nagpagupit. Huwag lang mangyari ang iniisp ko na pageeksperementuhan nya ako at hindi pantay na gupit! Pagkaupo ko medyo nakita kong napatingin yung tatlong beteranong Barbero, nasa direksyon ko yung tingin nila. Kung hindi nga lang sila nakasuot ng face mask ay makikita ko ang pagsmirk nila na nagsasabing “Kawawang bata to…”

Kakaupo ko pa lang ay nakaramdam na ako ng init, yung electric fan pala hindi nakabukas! Kaiba dun sa tatlong barber na nakatapat pa sa customer yung bentilador. Medyo naiilang yata sya, kaya naman sibabihan ko na…

“Kuya pwedeng pabuksan ng electric fan…”

“Ay OO Sori! Nakalimutan ko…” tugon nya na halatang kinakabahan at malalim ang iniisip.

“Kuya bawas lang po a, banda dito (itinuro ko yung area na gugupitan nya)…”

“Ahhh… Ok po…” sabi nya habang inaayos yung kumot na itatali nya sa leeg ko.

Ayoko naman maintimidate sya at lalong kabahan kaya pumikit na lang ako. Bahala na sya sa gagawin nya! Walang pisik-pisik ng tubig sa buhok ko ay bigla na lang nyang ginupitan ang buhok ko. Magaan ang paggupit nya halata ang iwas sa pagkakamali. Wala pang 2 minuto ay nagsalita yung isang beteranong Barbero.

“Basain mo muna yung buhok niya para madaling gupitan…”

“Ayyy… Oo… Saglit lang…” At naramdaman ko ngang medyo binasa nya ang buhok ko. Ayoko talaga tumingin sa salamin, una ayoko madistract sa kagwapuhan ko at pangalawa baka magilitan ko sa leeg si Kuya kapag pangit ang pagkakagupit.

Karaniwan, gumagamit ng Razor yung mga pinapagupitan ko pero si kuya hindi. Dalawang gunting lang yung ginamit nya sa akin, yung isa parang maysuklay at yung isa parang gunting na patulis at mahaba.

Mabagal sya maggupit at medyo maingat sa bawat anggulo ng paggugupitan nya. Magaling sya, PRAMIS! Minsan lang ako nakapagpagupit ng walang tulong ng Razor. Pagkaraang ng mga 30 to 45 minuto, tapos na si Kuya! Matagal na iyon para sa isang gupitan, sobra-sobrang paglalaan ng oras para sa kakarampot na halaga.

Iminulat ko ang mga mata ko at nakita ang itsura ko sa salamin. Isa lang ang nasabi ko, PUTEK ANG GWAPO KO!

Magkahalong paghanga at tuwa ang naramdaman ko kay Kuya. HINDI ko talaga akalain na magagawa nya yung ganoong bagay lalo na’t walang pumapansin sa kanya. Doon lang sya sa isang sulok, nag-aantay ng customer at ako naglakas ng loob na bilhin ang serbisyo nya na pagupitan.

Dahil nasiyahan ako kay Kuya, binigyan ko sya ng P100. Sobra-sobra na para sa isang gupitan. Kabayaran ko na din yun sa pagdududa sa kanyang kakayahan. Pagkatapos ko magbayad ay tinapik ko yung balikat ni kuya, pagpapahiwatig na MAGALING! MAGALING! Lumabas ako ng Barber Shop na masaya. Nakakatuwa ding malaman na pagkatapos ko ay may sumunod na tatlong magpapagupit kay Kuya…

Natutunan kong huwag manghusga ayon sa pisikal na itsura, hindi naman yun ang binibili mo kundi yung kakayanan nyang magbigay ng magandang serbisyo ayon sa halaga ng pagkakaunawa mo…

Matatagpuan yung Barber Shop sa Rizal St., Barretto, Olongapo City. Malapit sa Palengke, hindi ko alam yung pangalan e, madali lang naman mahanap yun lalo na kung magtatanong ka…


BUWAHAHA…
IpakoSaKrus!